Kwa mujibu wa Idara ya Habari za Kimataifa ya Shirika la Habari la Hawza, kundi la machifu, wazee wa koo na wachungaji wa makabila ya kaskazini mwa Nigeria — wakiwemo wawakilishi wa jamii kubwa za Odawa, Birnin Gwari, na Shado — walikutana jana na kiongozi wa Harakati ya Kiislamu nchini humo, Sheikh Ibrahim Zakzaky, katika makaazi yake mjini Abuja, mji mkuu wa nchi hiyo, kwa ajili ya kubadilishana mawazo.

Kikao hicho kilichodumu takriban saa tatu, kilianza kwa Sheikh Zakzaky kuwakaribisha wageni na kuonesha furaha yake kubwa kwa kukutana mara ya kwanza na baadhi ya machifu na wachungaji wa maeneo hayo.

Katika mazungumzo hayo, wazee na viongozi hao walieleza changamoto zinazowakabili wananchi wa maeneo yao, hasa tatizo la uhamiaji wa kulazimishwa na mashambulizi ya wageni. Walitaja mojawapo ya sababu kuu za ukurasa wa nyuma wa maendeleo ya kaskazini kuwa ni hali mbaya ya usalama na uvamizi unaofanywa na vikundi vya waasi wenye silaha vilivyoko katika eneo hilo.

Sheikh Ibrahim Zakzaky, kiongozi wa Waislamu wa madhehebu ya Shia nchini Nigeria, katika mazungumzo hayo alifafanua njama zilizoko nyuma ya harakati za kigaidi na mipango yao ya muda mrefu katika kanda ya kaskazini, akiwaambia washiriki:

“Utajiri na rasilimali zilizo chini ya ardhi yenu ndizo sababu pekee zinazowasukuma magaidi na makundi ya kitakfiri kufanya mashambulizi na mauaji dhidi ya watu wa kaskazini.”

Akaongeza kuwa:

“Adui, kwa kupanga kwa makini na kwa kulenga kizazi cha vijana, alijaribu kuiba tamaduni, maadili na urithi wa mababu zetu. Na baada ya kushindwa kufanikiwa katika hilo, sasa ametumia nguvu na vitisho ili kuwafanya watu wa kaskazini wahame kwa lazima, ili waweze kudhibiti migodi na rasilimali zao.”

Mwisho wa kikao hicho, Sheikh Zakzaky alieleza kuwa hali ya sasa huko kaskazini ni ngumu na ya kutisha, lakini akaongeza kuwa matumaini yapo kwenye:
“Dua na kumtegemea Mwenyezi Mungu na ndizo silaha pekee za muumini. Dhulma haitadumu milele, na kwa mapenzi ya Mungu, hivi karibuni amani itatawala ulimwengu mzima.”